ਨਿਊਜ਼ੀਲੈਂਡ ਵਿੱਚ ਵਰਤੇ ਜਾਂਦੇ ਡਿਜ਼ਿਟਲ ਦਵਾਈ ਪ੍ਰਬੰਧਨ ਸਿਸਟਮ MediMap ‘ਤੇ ਹੋਏ ਵੱਡੇ ਸਾਇਬਰ ਹਮਲੇ ਤੋਂ ਬਾਅਦ ਮਰੀਜ਼ਾਂ ਦੇ ਰਿਕਾਰਡ ਵਿੱਚ ਗੰਭੀਰ ਤਕਨੀਕੀ ਗੜਬੜਾਂ ਸਾਹਮਣੇ ਆਈਆਂ ਹਨ। ਕੁਝ ਜੀਵਿਤ ਮਰੀਜ਼ਾਂ ਨੂੰ ਸਿਸਟਮ ਵਿੱਚ ਮ੍ਰਿਤਕ ਦਰਸਾਇਆ ਗਿਆ, ਜਦਕਿ ਕਈਆਂ ਦੇ ਨਾਮ ਵੀ ਗਲਤ ਤਰੀਕੇ ਨਾਲ ਬਦਲੇ ਗਏ।
ਹਮਲੇ ਤੋਂ ਬਾਅਦ ਸੁਰੱਖਿਆ ਕਾਰਣ MediMap ਪਲੇਟਫਾਰਮ ਨੂੰ ਅਸਥਾਈ ਤੌਰ ‘ਤੇ ਆਫਲਾਈਨ ਕਰ ਦਿੱਤਾ ਗਿਆ ਹੈ। ਅਧਿਕਾਰੀਆਂ ਨੇ ਪੁਸ਼ਟੀ ਕੀਤੀ ਹੈ ਕਿ ਕੁਝ ਮਰੀਜ਼ਾਂ ਦੇ ਡਾਟਾ ਵਿੱਚ ਬਿਨਾਂ ਅਧਿਕਾਰ ਸੋਧ ਕੀਤੀ ਗਈ ਹੈ।
ਇਹ ਡਿਜ਼ਿਟਲ ਸਿਸਟਮ ਦੇਸ਼ ਭਰ ਦੇ ਬੁਜ਼ੁਰਗ ਸੰਭਾਲ ਕੇਂਦਰਾਂ, ਅਪਾਹਜਤਾ ਸੇਵਾਵਾਂ, ਹੋਸਪਿਸ ਅਤੇ ਕਮਿਊਨਿਟੀ ਹੈਲਥ ਸੈਕਟਰ ਵਿੱਚ ਦਵਾਈ ਪ੍ਰਬੰਧਨ ਲਈ ਵਿਆਪਕ ਤੌਰ ‘ਤੇ ਵਰਤਿਆ ਜਾਂਦਾ ਹੈ।
ਇੱਕ ਰਜਿਸਟਰਡ ਨਰਸ ਮੁਤਾਬਕ ਸਿਸਟਮ ਵਿੱਚ ਆਈ ਗੜਬੜ ਕਾਰਨ ਸਟਾਫ ਵਿੱਚ ਚਿੰਤਾ ਦਾ ਮਾਹੌਲ ਬਣ ਗਿਆ, ਜਦੋਂ ਕੁਝ ਮਰੀਜ਼ਾਂ ਦੇ ਰਿਕਾਰਡ ਗਲਤ ਜਾਣਕਾਰੀ ਦਿਖਾਉਣ ਲੱਗੇ। ਜਾਂਚ ਦੌਰਾਨ ਪਤਾ ਲੱਗਿਆ ਕਿ ਕੁਝ ਮਰੀਜ਼ਾਂ ਦੀ ਉਮਰ, ਨਾਮ ਅਤੇ ਸਹੂਲਤਾਂ ਨਾਲ ਸੰਬੰਧਿਤ ਜਾਣਕਾਰੀ ਵੀ ਤਬਦੀਲ ਹੋ ਚੁੱਕੀ ਸੀ।
ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਇਸ ਸਾਇਬਰ ਹਮਲੇ ਨਾਲ ਕਈ ਹੈਲਥ ਪ੍ਰੋਵਾਈਡਰ ਪ੍ਰਭਾਵਿਤ ਹੋਏ ਹਨ ਅਤੇ ਹਜ਼ਾਰਾਂ ਮਰੀਜ਼ਾਂ ਦਾ ਡਾਟਾ ਪ੍ਰਭਾਵ ਹੇਠ ਆ ਸਕਦਾ ਹੈ। ਮਾਮਲੇ ਦੀ ਜਾਂਚ ਜਾਰੀ ਹੈ ਅਤੇ ਸਾਇਬਰ ਸੁਰੱਖਿਆ ਪ੍ਰਣਾਲੀਆਂ ਦੀ ਸਮੀਖਿਆ ਕੀਤੀ ਜਾ ਰਹੀ ਹੈ।
