ਚੱਕਰਵਾਤੀ ਤੂਫ਼ਾਨ ‘ਮੋਕਾ’ ਕਈ ਹੱਦ ਤੱਕ ਖ਼ਤਰਨਾਕ ਬਣ ਚੁੱਕਾ ਹੈ। ਇਹ ਅੱਜ ਯਾਨੀ ਐਤਵਾਰ ਨੂੰ ਬੰਗਲਾਦੇਸ਼ ਅਤੇ ਮਿਆਂਮਾਰ ਦੇ ਤੱਟਾਂ ‘ਤੇ ਦਸਤਕ ਦੇ ਸਕਦਾ ਹੈ। ਇਸ ਤੂਫਾਨ ਨਾਲ ਬੰਗਲਾਦੇਸ਼ ਅਤੇ ਮਿਆਂਮਾਰ ਦੇ ਹਜ਼ਾਰਾਂ ਲੋਕ ਪ੍ਰਭਾਵਿਤ ਹੋ ਸਕਦੇ ਹਨ। 240 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫਤਾਰ ਨਾਲ ਹਵਾਵਾਂ ਚੱਲਣ ਦੀ ਸੰਭਾਵਨਾ ਹੈ ਅਤੇ 12 ਫੁੱਟ ਤੱਕ ਸਮੁੰਦਰੀ ਲਹਿਰਾਂ ਉੱਠਣ ਦੀ ਸੰਭਾਵਨਾ ਹੈ। ਇਸ ਦਾ ਸਭ ਤੋਂ ਵੱਧ ਅਸਰ ਮਿਆਂਮਾਰ ਦੇ ਰਖਾਇਨ ਅਤੇ ਚਿਨ ਰਾਜਾਂ ਵਿੱਚ ਦੇਖਣ ਨੂੰ ਮਿਲੇਗਾ।
ਸਥਾਨਕ ਲੋਕਾਂ ਨੂੰ ਜ਼ੋਖ਼ਮ ਵਾਲੇ ਖੇਤਰਾਂ ਤੋਂ ਹਟਾਇਆ ਗਿਆ
ਸੰਯੁਕਤ ਰਾਸ਼ਟਰ ਸੈਟੇਲਾਈਟ ਸੈਂਟਰ ਨੇ ਚਿਤਾਵਨੀ ਦਿੱਤੀ ਹੈ ਕਿ ਜੇਕਰ ਇਹ ਤੂਫਾਨ ਬੰਗਾਲ ਦੀ ਖਾੜੀ ਵੱਲ ਵਧਦਾ ਹੈ ਤਾਂ ਵੱਡੀ ਗਿਣਤੀ ‘ਚ ਲੋਕ ਪ੍ਰਭਾਵਿਤ ਹੋ ਸਕਦੇ ਹਨ। ਬੰਗਲਾਦੇਸ਼ ਵਿੱਚ ਆਫ਼ਤ ਰਾਹਤ ਅਧਿਕਾਰੀ ਮਿਜ਼ਾਨੁਰ ਰਹਿਮਾਨ ਨੇ ਕਿਹਾ: “ਜਾਨਾਂ ਨੂੰ ਬਚਾਉਣਾ ਸਾਡੀ ਤਰਜੀਹ ਹੈ, ਅਸੀਂ ਦੁਪਹਿਰ ਦੇ ਕਰੀਬ ਤੂਫਾਨ ਆਉਣ ਤੋਂ ਪਹਿਲਾਂ 300,000 ਲੋਕਾਂ ਨੂੰ ਜੋਖਮ ਵਾਲੇ ਖੇਤਰਾਂ ਤੋਂ ਬਾਹਰ ਕੱਢ ਲਿਆ ਹੈ।
ਰਾਹਤ ਪੈਕੇਜ ਲਈ ਪ੍ਰਬੰਧ
ਸਹਾਇਤਾ ਕਰਮਚਾਰੀ ਚੱਕਰਵਾਤ ਦੇ ਰਸਤੇ ਦੇ ਨੇੜੇ, ਕੋਕਸ ਬਾਜ਼ਾਰ ਦੇ ਬੀਚ ਕਸਬੇ ਵਿੱਚ ਕੈਂਪਾਂ ਵਿੱਚ ਰਹਿ ਰਹੇ 10 ਲੱਖ ਤੋਂ ਵੱਧ ਰੋਹਿੰਗਿਆ ਸ਼ਰਨਾਰਥੀਆਂ ਬਾਰੇ ਚਿੰਤਤ ਹਨ। ਐਕਸ਼ਨ ਏਡ ਬੰਗਲਾਦੇਸ਼ ਦੇ ਫਰਾਹ ਕਬੀਰ ਨੇ ਕਿਹਾ, “ਜੋਖਮ ਵਾਲੇ ਖੇਤਰਾਂ ਤੋਂ ਲੋਕਾਂ ਨੂੰ ਸੁਰੱਖਿਅਤ ਆਸਰਾ ਸਥਾਨਾਂ ਵਿੱਚ ਤਬਦੀਲ ਕਰਨ ਦੀ ਪ੍ਰਕਿਰਿਆ ਜਾਰੀ ਹੈ ਅਤੇ ਅਸੀਂ ਰਾਹਤ ਪੈਕੇਜਾਂ ਦਾ ਵੀ ਪ੍ਰਬੰਧ ਕਰ ਰਹੇ ਹਾਂ।”
ਸਥਾਨਕ ਲੋਕਾਂ ਦੇ ਸਹਿਯੋਗ ਨਾਲ ਕੀਤਾ ਜਾ ਰਿਹਾ ਭੋਜਨ ਦਾ ਪ੍ਰਬੰਧ
ਪ੍ਰਾਪਤ ਜਾਣਕਾਰੀ ਅਨੁਸਾਰ ਮਿਆਂਮਾਰ ਦੇ ਗ਼ਰੀਬ ਰਾਖੀਨ ਸੂਬੇ ਵਿੱਚ ਪਿਛਲੇ ਹਫ਼ਤੇ ਤੋਂ ਤਕਰੀਬਨ 100,000 ਲੋਕ ਸੁਰੱਖਿਅਤ ਇਲਾਕਿਆਂ ਵਿੱਚ ਚਲੇ ਗਏ ਹਨ। ਅਰਾਕਾਨ ਆਰਮੀ ਦੇ ਬੁਲਾਰੇ ਖਿਨ ਥੂ ਖਾ ਨੇ ਕਿਹਾ, “ਅਸੀਂ ਇਲਾਕੇ ਦੇ ਮੱਠਾਂ ਅਤੇ ਸਕੂਲਾਂ ਨੂੰ ਆਸਰਾ ਦੇ ਤੌਰ ‘ਤੇ ਵਰਤ ਰਹੇ ਹਾਂ। ਅਸੀਂ ਸਥਾਨਕ ਨਿਵਾਸੀਆਂ ਦੇ ਸਹਿਯੋਗ ਨਾਲ ਭੋਜਨ ਦਾ ਪ੍ਰਬੰਧ ਕੀਤਾ ਹੈ, ਪਰ ਜੇਕਰ ਅਜਿਹਾ ਲੰਬੇ ਸਮੇਂ ਤੱਕ ਚੱਲਦਾ ਰਿਹਾ ਤਾਂ ਮੁਸੀਬਤ ਵਧ ਸਕਦੀ ਹੈ।”
ਮਿਆਂਮਾਰ ਵਿੱਚ ਉਡਾਣਾਂ ਰੱਦ
ਮਿਆਂਮਾਰ ਏਅਰਵੇਜ਼ ਇੰਟਰਨੈਸ਼ਨਲ ਨੇ ਕਿਹਾ ਕਿ ਰੱਖਾਈਨ ਰਾਜ ਲਈ ਉਸ ਦੀਆਂ ਸਾਰੀਆਂ ਉਡਾਣਾਂ ਸੋਮਵਾਰ ਤੱਕ ਮੁਅੱਤਲ ਕਰ ਦਿੱਤੀਆਂ ਗਈਆਂ ਹਨ। ਮਿਆਂਮਾਰ ਰੈੱਡ ਕਰਾਸ ਸੁਸਾਇਟੀ ਨੇ ਕਿਹਾ ਕਿ ਉਹ ਐਮਰਜੈਂਸੀ ਦੀ ਤਿਆਰੀ ਕਰ ਰਹੀ ਹੈ। ਬੰਗਲਾਦੇਸ਼ ਦੀ ਸਭ ਤੋਂ ਵੱਡੀ ਬੰਦਰਗਾਹ ਚਟਗਾਂਵ ‘ਤੇ ਸੰਚਾਲਨ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਸੀ। ਕਿਸ਼ਤੀ ਆਵਾਜਾਈ ਅਤੇ ਮੱਛੀ ਫੜਨ ‘ਤੇ ਵੀ ਪਾਬੰਦੀ ਲਗਾਈ ਗਈ ਹੈ।
