ਹਰਮਨਪ੍ਰੀਤ ਕੌਰ (Harmanpreet Kaur) ਦੀ ਅਗਵਾਈ ਵਾਲੀ ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਬੰਗਲਾਦੇਸ਼ ਦੇ ਦੌਰੇ ‘ਤੇ ਹੈ। ਦੋਵਾਂ ਦੇਸ਼ਾਂ ਵਿਚਾਲੇ ਤੀਜਾ ਅਤੇ ਫੈਸਲਾਕੁੰਨ ਇਕ ਦਿਨਾ ਮੈਚ ਮੀਰਪੁਰ ‘ਚ ਖੇਡਿਆ ਜਾ ਰਿਹਾ ਹੈ। ਇਸ ਮੈਚ ‘ਚ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਬੰਗਲਾਦੇਸ਼ ਨੇ 4 ਵਿਕਟਾਂ ਦੇ ਨੁਕਸਾਨ ‘ਤੇ 225 ਦੌੜਾਂ ਬਣਾਈਆਂ, ਜੋ ਵਨਡੇ ‘ਚ ਬੰਗਲਾਦੇਸ਼ ਦਾ ਦੂਜਾ ਸਭ ਤੋਂ ਵੱਡਾ ਸਕੋਰ ਹੈ।
226 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਨ ਉਤਰੀ ਭਾਰਤੀ ਕਪਤਾਨ ਹਰਮਨਪ੍ਰੀਤ ਕੌਰ 14 ਦੌੜਾਂ ਬਣਾ ਕੇ ਆਊਟ ਹੋ ਗਈ। ਉਸ ਨੇ ਨਾਹਿਦਾ ਅਖਤਰ ਦੀ ਗੇਂਦ ਨੂੰ ਸਵੀਪ ਕਰਨ ਦੀ ਕੋਸ਼ਿਸ਼ ਕੀਤੀ। ਪਰ ਉਹ ਸ਼ਾਟ ਤੋਂ ਖੁੰਝ ਗਈ ਅਤੇ ਜਿਵੇਂ ਹੀ ਅਪੀਲ ਹੋਈ, ਅੰਪਾਇਰ ਨੇ ਉਸ ਨੂੰ ਆਊਟ ਘੋਸ਼ਿਤ ਕਰ ਦਿੱਤਾ।
ਅੰਪਾਇਰ ਦੇ ਫੈਸਲੇ ਤੋਂ ਹਰਮਨਪ੍ਰੀਤ ਕੌਰ ਇੰਨੀ ਗੁੱਸੇ ‘ਚ ਆ ਗਈ ਕਿ ਉਸ ਨੇ ਆਪਣਾ ਬੱਲਾ ਸਟੰਪ ‘ਤੇ ਮਾਰਿਆ। ਜਾਂਦੇ ਸਮੇਂ ਉਸ ਨੇ ਅੰਪਾਇਰ ਨੂੰ ਬੱਲਾ ਦਿਖਾਇਆ ਅਤੇ ਇਹ ਦੱਸਣ ਦੀ ਕੋਸ਼ਿਸ਼ ਕੀਤੀ ਕਿ ਗੇਂਦ ਉਸ ਦੇ ਬੱਲੇ ਨਾਲ ਲੱਗੀ ਸੀ। ਇੰਨਾ ਹੀ ਨਹੀਂ ਪੈਵੇਲੀਅਨ ਪਰਤਦੇ ਹੋਏ ਭਾਰਤੀ ਕਪਤਾਨ ਨੇ ਦਰਸ਼ਕਾਂ ਵੱਲ ਆਪਣਾ ਅੰਗੂਠਾ ਵੀ ਦਿਖਾਇਆ।
ਇਸ ਮਾਮਲੇ ਨੂੰ ਲੈ ਹੁਣ ਹਰਮਨਪ੍ਰੀਤ ਕੌਰ ਉੱਪਰ ਜ਼ੁਰਮਾਨਾ ਲਗਾਇਆ ਗਿਆ ਹੈ। ਭਾਰਤੀ ਕਪਤਾਨ ਹਰਮਨਪ੍ਰੀਤ ਕੌਰ ‘ਤੇ ਸ਼ੇਰ-ਏ-ਬੰਗਲਾ ਨੈਸ਼ਨਲ ਸਟੇਡੀਅਮ ‘ਚ ਭਾਰਤ ਵਿਰੁੱਧ ਤੀਜੇ ਵਨਡੇ ਦੌਰਾਨ ਉਸ ਦੇ ਵਿਵਹਾਰ ਲਈ ਉਸ ਦੀ ਮੈਚ ਫੀਸ ਦਾ 75 ਫੀਸਦੀ ਜੁਰਮਾਨਾ ਲਗਾਇਆ ਗਿਆ ਹੈ।
ਸ਼ਨੀਵਾਰ ਨੂੰ ਹੋਈ ਇਸ ਘਟਨਾ ਵਿੱਚ ਹਰਮਨਪ੍ਰੀਤ ਨੇ ਆਪਣੇ ਬੱਲੇ ਨਾਲ ਸਟੰਪ ਤੋੜ ਦਿੱਤਾ ਅਤੇ ਐਲਬੀਡਬਲਯੂ ਆਊਟ ਹੋਣ ਤੋਂ ਬਾਅਦ ਅੰਪਾਇਰ ਤਨਵੀਰ ਅਹਿਮਦ ਨਾਲ ਬਹਿਸ ਹੋਈ। ਮੈਚ ਅਧਿਕਾਰੀ ਨੇ ਪੁਸ਼ਟੀ ਕੀਤੀ ਕਿ ਇਸ ਨੂੰ ਲੈਵਲ ਦੋ ਅਪਰਾਧ ਵਜੋਂ ਸ਼੍ਰੇਣੀਬੱਧ ਕੀਤਾ ਗਿਆ।
ਨਾਹਿਦ ਦੀ ਇਹ ਗੇਂਦ ਮਿਡਲ ਅਤੇ ਲੈੱਗ ਸਟੰਪ ‘ਤੇ ਪਈ ਸੀ ਅਤੇ ਕੌਰ ਨੇ ਇਸ ‘ਤੇ ਸਵੀਪ ਖੇਡਣ ਦੀ ਕੋਸ਼ਿਸ਼ ਕੀਤੀ। ਗੇਂਦ ਉਸ ਦੇ ਪੈਡ ਨਾਲ ਲੱਗੀ ਅਤੇ ਸਲਿਪ ਵੱਲ ਗਈ, ਜਿੱਥੇ ਫੀਲਡਰ ਨੇ ਗੇਂਦ ਨੂੰ ਫੜ ਲਿਆ। ਇਸ ਦੌਰਾਨ ਅੰਪਾਇਰ ਨੇ ਹਰਮਨਪ੍ਰੀਤ ਕੌਰ ਨੂੰ ਐਲਬੀਡਬਲਯੂ ਆਊਟ ਦਿੱਤਾ।
